50 حاجة تاخد بالك منهم في حياتك



1- خطط لنفسك وخلي عندك أهداف، مينفعش تعيش بمبدأ "زي ما تيجي، تيجي".
2- مش مهم عدد الأهداف، 3 أهداف كبيرة أحسن من 30 هدف ملهمش لزمة.
3- ما تستصغرش أي خطوة بتخطوها للأمام، لأنها ممكن تكون الخطوة الأخيرة قبل النجاح.
4- ربنا اللي بيوفقك، مش أهدافك واجتهادك هما السبب الرئيسي في نجاحك.
5- عليك العمل وعلى الله النتيجة.
6- ما تقفلش أي باب بالمفتاح، انت متعرفش الخير هيجي من أني باب.
7- ربنا بيرزقك على قد تعبك واجتهادك، مش على قد امكانياتك.
8- كل حاجة ليها ثمن، وكل ما الحاجة كانت أكثر قيمة، كل ما الثمن كان أغلى.
9- قول "لأ" كتير جدا، لأ لأي حد بيضيع وقتك، لأي حد محبط، لأي هدف مش هيفيدك، لأي حاجة ملهاش لزمة.
10- "KISS": Keep It Super Simple... 
الحياة سخيفة وممكن تخلص في أي لحظة، عيش ببساطة ومتعقدش الدنيا.
11- علاقاتك بالناس مهمة جدا.
12- علاقتك بنفسك أهم من علاقتك بالناس.
13- علاقتك بربنا أهم من النقطتين اللي فاتوا.
14- اشتغل بضمير، ربنا مش بيضيع أي تعب أو مجهود.
15- الفلوس بتروح بسهولة، اصرفها في حاجات تستحق.
16- رزقك مكتوب، وانفاقك مكتوب، لو فاكر انك هتوفر 100 جنيه ومش هتتصدق بيهم، هتصرفهم في صيانة عربية أو هيضيعوا مثلا.
17- خلي عندك مبدأ.
18- هعيد نقطة رقم 14: اشتغل بضمير، ربنا مش بيضيع أي تعب أو مجهود أي حد.
19- في طريقك هتخسر كتير (فلوس، علاقات، مجهود)، مش مهم تخسر، المهم تخسر عشان حاجة تستاهل.
20- اشتري دماغك، سلامك الداخلي يساوي ثروة بيل جيتس وأكثر منها كمان.
21- الصحة، الصحة، الصحة، لو بتصحى وبتمشي على رجلك وبتدخل الحمام –أعزك الله- من غير مساعدة حد، فأنت في نعمة كبيرة أوي.
22- هات آخرك في الشغل، ربنا لو ما اكرمش دلوقتي، فأكيد هيكرمك بعدين.
23- إيمانك بالله مش هيظهر إلا في حاجتين، لما تفقد كل شئ، ولما تمتلك كل شئ.
24- احترس من أصدقاء السوء، المحبطين والسلبيين أكثر ضررا عليك من أي حاجة تانية في الدنيا.
25- ماتجيش على نفسك عشان الناس، محدش هيقولك شكرا، ده هيبقى حق مكتسب لهم.
26- اعمل حدود لنفسك في تعاملك مع الناس.
27- خد بالك من الناس اللي بتتعامل معاهم وبتحتك بيهم دايما، لأنك بشكل أو بآخر هتلاقي نفسك شبههم في حاجات كتير.
28- طالما مش بتعمل حاجة حرام، ماحدش له عندك حاجة.
29- ما تقولش "آسف" عمال على بطال، كلمة "آسف" لا إراديا بتخليك مكسور نفسيا أمام الشخص اللي بتعتذرله.
30- لا تبرر لأي شخص، إنت حر في حياتك.


31- "سُمعتك" مهمة جدا.
32- ساعد الناس.
33- ساعد الناس.
34- ساعد الناس.
35- لازم تخصص وقت لنفسك، افصل من كل حاجة.
36- حاسب نفسك كل يوم.
37- لازم تحترم كل الناس، لكن مش لازم تحب كل الناس.
38- اتعلّم كل يوم، مش لازم ورقة وقلم أو كتاب أو كورس، ممكن تتعلم عن طريق الشغل، احتكاك بفئات كتير في المجتمع، والأهم إنك تتعلم من أخطاءك.
39- احتفل بإنجازاتك ولو صغيرة.
40- اعمل قائمة للمهام اليومية وتأكد إنها نابعة من أهدافك وخططك.
41- مش لازم تعبر عن رأيك في كل موقف بيحصل، كبّر مخك.
42- جرب حاجات جديدة.
43- مافيش حاجة بتتعمل مظبوط من أول مرة، لازم تجرب مرة و2 و3 وممكن أكثر عشان تتظبط.
44- العمل أهم من العلم، والعمل مع العلم = نجاح.
45- دايما في مستوى أعلى من مستواك الحالي، حاول توصل له.
46- الدنيا مش بتمشي على مزاجك، تقبل الحقيقة دي.
47- لا تغضب.
48- اعمل (انفولو) في الفيسبوك للناس اللي بوستاتهم سلبية وبتقفلك !.
49- تابع الناس الملهمة والإيجابية على الفيسبوك.
50- ركّز ! ركّز ! ركّز.
 




مواضيع ذات صلة
مقالات مفيده